عەبدوڵڵا پەشێو مژدە | Ebdulla Peşêw

• مژدە
• گوێم لێ بگرن!
  مژدەم پێیە، بۆ هەمووتان:
  کەفەڵپان و ڕیوەڵەتان،
  زڕتەبۆز و بوودەڵەتان،
  سیخوڕ و بەچکەسیخوڕتان،
  سکرتێر و تڕژمێر و میراخوڕتان،
  یەک یەک وەزیر و گزیرتان
  قونکی پیاز و سەری سیرتان
  دەیڵێمەوە،
  مژدەم پێیە بۆ هەمووتان:
  سەر و سەکوت بە بۆیاخ و بێ بۆیاختان،
  فایلسووک و فایلقورسی شار و شاختان
  ملیۆنێر و ملیاردێرتان
  یەکژنداری بەردکونکەرە و
  دەژنداری بنزگتێرتان،
  گوێم لێ بگرن،
  چونکە ئێوە لەم دنیایە،
  کۆبوونەوەی شەووڕۆژتان دوایی نایە،
  چونکە ئێوە،
  هەموو عومر
  ئەم بۆ لای ئەو،
  ئەو بۆ لای ئەم،
  هەر خەریکی ڕاکەڕاکەن
  چونکە ئێوە لە گۆڕیشدا
  بێ یەکتری قەت هەڵناکەن،
  خەونم دیوە
  مژدەم پێیە بۆ هەمووتان:
  کە دەشمرن،
  خەمتان نەبێ، دڵنیا بن…
  لە دۆزەخدا کۆ دەبنەوە،
  کۆ دەبنەوە و هاوێر نابن!
  عەبدوڵڵا پەشێو
  ٢٠١٩/٢/٢
• gwêm lê bigirin!
  mijdem pêye, bo hemûtan:
  kefeɫpan û řîweɫetan,
  ziřteboz û bûdeɫetan,
  sîxuř û beçkesîxuřtan,
  sikirtêr û tiřjmêr û mîraxuřtan,
  yek yek wezîr û gizîrtan
  qunkî pyaz û serî sîrtan
  deyɫêmewe,
  mijdem pêye bo hemûtan:
  ser û sekut be boyax û bê boyaxtan,
  faylsûk û faylqursî şar û şaxtan
  milyonêr û milyardêrtan
  yekijndarî beridkunkere û
  dejindarî binizgtêrtan,
  gwêm lê bigirin,
  çunke êwe lem dinyaye,
  kobûnewey şewuřojtan dwayî naye,
  çunke êwe,
  hemû 'umir
  em bo lay ew,
  ew bo lay em,
  her xerîkî řakeřaken
  çunke êwe le gořîşda
  bê yektrî qet heɫnaken,
  xewnm dîwe
  mijdem pêye bo hemûtan:
  ke deşimrn,
  xemtan nebê, diɫnya bin…
  le dozexda ko debnewe,
  ko debnewe û hawêr nabin!
  'ebduɫɫa peşêw