唔經唔覺，蘋果案審訊已經去到第三十三日。尋日案情講到，陳沛敏以及一眾同事，決定最後一日要印一百萬份。睇到呢度，我更加敬佩阿敏；當時佢已經被捕，但仍然堅守到最後一刻；嗱，呢啲就真係「留低係需要勇氣」喇。其他堅守到最後一刻嘅各位同事，我都認為係大仁大義。畢竟當時已經人人自危，佢哋仍然願意出埋最後一份紙，個份勇氣真係都唔容易。我同其他同事，從前都未必好好朋友，依家就更加流散世界各地，但我都好希望有一日大家可以有機會再會。案情審咗咁多日，我嘅感覺係，幾個法官同主控官，不但無令香港人覺得受審嘅人有罪，反而令我哋更加懷念過去嘅香港；亦同時因為呢次審訊，畀更多人可以從另外一個角度去欣賞蘋果日報呢間公司。肥佬黎係一個好鍾意試新嘢嘅人，但同時佢亦好識得點樣去建立一個機構。你睇，蘋果可以運作到最後一刻，絕對可以稱得上臨危不亂。對比下，呢個特區政府連搞一場足球友誼賽，放個心心汽球一都可以鬧出國際笑話；兩者，根本就係兩個層次嘅存在。 常言道，culture eats strategy for breakfast 。蘋果又好，壹傳媒又好，都係有自己好獨特嘅文化；而呢個文化，亦都係令一個機構有生命力嘅原因。肥佬黎點解受審？早...
唔經唔覺，蘋果案審訊已經去到第三十三日。尋日案情講到，陳沛敏以及一眾同事，決定最後一日要印一百萬份。睇到呢度，我更加敬佩阿敏；當時佢已經被捕，但仍然堅守到最後一刻；嗱，呢啲就真係「留低係需要勇氣」喇。
其他堅守到最後一刻嘅各位同事，我都認為係大仁大義。畢竟當時已經人人自危，佢哋仍然願意出埋最後一份紙，個份勇氣真係都唔容易。我同其他同事，從前都未必好好朋友，依家就更加流散世界各地，但我都好希望有一日大家可以有機會再會。
案情審咗咁多日，我嘅感覺係，幾個法官同主控官，不但無令香港人覺得受審嘅人有罪，反而令我哋更加懷念過去嘅香港；亦同時因為呢次審訊，畀更多人可以從另外一個角度去欣賞蘋果日報呢間公司。
肥佬黎係一個好鍾意試新嘢嘅人，但同時佢亦好識得點樣去建立一個機構。你睇，蘋果可以運作到最後一刻，絕對可以稱得上臨危不亂。對比下，呢個特區政府連搞一場足球友誼賽，放個心心汽球一都可以鬧出國際笑話；兩者，根本就係兩個層次嘅存在。
常言道，culture eats strategy for breakfast 。蘋果又好，壹傳媒又好，都係有自己好獨特嘅文化；而呢個文化，亦都係令一個機構有生命力嘅原因。
肥佬黎點解受審？早兩日，有人話去我個 Facebook Page 留言，話佢「懷壁其罪」；呢個形容真係妙。
北京對肥佬黎嘅指控，唔單係因為佢做過啲乜，更加係因為佢有創造文化嘅能力。
香港當然都有其他人識做生意，但好似肥佬黎咁有覺悟，甘願冒呢個險去為香港講出真正香港人嘅聲音，肥佬算係係極少數。佢成日都話：「共產黨有乜好驚呀？」呢個亦先至係佢受審嘅原因。
共產黨最想你信，佢哋無所不能。假如你唔信，佢就無所不用其極，要你怕。我可以大膽講，香港班生意人，佢哋唔係信共產黨，而係怕共產黨，怕出聲，怕會槍打出頭鳥。
共產黨依家要堆砌嘅罪名，係勾結外國勢力，即係小粉紅口中嘅「漢奸」。呢個罪名當然砌生豬肉喇。請容許我講遠少少，小粉紅，佢哋粉紅色嘅腦袋，係充滿矛盾；呢班人心底裡呢先至係最崇洋媚外，對真正嘅中華文化，又係知啲唔知啲；雖然成日把滿口仁義禮智信，但行為上就不仁不義無禮失智失信。
認識黎智英嘅人就知，雖然佢唔係大中華膠，但佢亦一啲唔仇恨中華文化，甚至從來無掩飾過自己出生於饑荒中嘅中國大陸；佢亦唔會唔識扮識，唔會扮信共產黨，唔會扮忠誠。
究竟肥佬黎係一個點嘅人？佢第一個身份係「被政治耽誤咗嘅生意人」；佢第二個身份係一個基督徒；第三個身份，係一個香港人。
當肥佬黎決志成為一個基督徒，佢會用自己嘅心靈智慧，去做一個教徒，去明白教義，去實踐基督嘅精神。我知道佢無怪教區同教會；佢係因為耶穌而信上帝，而唔係因為教會而信上帝。
但黎智英最重要嘅身份，係一個香港人。
佢心目中嘅香港，唔係單純地域上嘅概念，而係一個畀咗佢生命嘅空間；連佢自己都話，無香港畀佢嘅自由，就唔會有黎智英。
諗返轉頭，八九六四之後，佢本來可以選擇走；唔係咩？當時共產黨已經露出真面目，甚至迫佢放棄 Giordano ，但佢好從容不迫咁就決定將成間公司賣咗佢，頭也不回，而且仲要將所有資金投入去創辦蘋果。
搞蘋果，你估實賺㗎？！香港地，你估搞傳媒唔會得罪人呀？！我開個 Facebook page 都有 haters 喇！當年佢真係可以唔需要搞蘋果，甚至唔需要留低，但佢一早做咗呢個決定。
留低嘅人，當然唔單止黎智英，仲有其他同事，其他香港人。今次受審嘅，亦唔單止黎智英，仲有其他同事。甚至我會話，整個香港，其實都一樣係被告，一齊受審。
當然，藍朋友仍然會堅持：「妖，你哋唔搞共產黨，佢哋又點會搞你？你哋唔搞共產黨，香港咁無事囉。」妖，真係咁？你睇吓啲外資？點解會雞咁腳咁走嘅？你睇大陸啲富豪，佢哋會唔會更了解大陸個套潛規則？你睇佢哋咪一樣走？
香港班有錢佬要扮愛國，因為佢哋貪圖家族嘅財富同地位；但如果香港唔再係從前個種獨特嘅狀態，呢班人仲憑乜嘢去保住自己嘅身家性命財產？佢哋以為，只要自己仍然有利用價值，共產黨就會畀佢哋繼續以香港豪族嘅身份，繼續享盡榮華富貴。
問題係，佢哋知唔知自己其實已經無乜利用價值？嗱，都咪話我唔好心提醒吓佢哋：「唔好以為你有利用價值；你哋嘅影響力，你哋嘅財富，對中共來講根本就係威脅。」
中共眼中，香港一早唔再有利用價值。佢哋早就想幾多個金融中心，然後返去從前嘅封關鎖國，入面有自己嘅內循環，同時又可以控制埋周邊嘅外循環，亦即係藍朋友小粉紅成日講，所謂嘅好大盤棋。
講到尾，北京根本只係想繼續統治，想同一班人嘅子孫，可以唔無憂無慮到公卿。試問呢種心態之下，香港對佢哋仲有乜嘢利用價值？香港班豪族，最多就係同啲中共高層，花天酒地，有錢大家搵。但依家佢哋唔識自己去尋歡咩？有錢，佢哋唔識搵咩？
究竟係邊啲人仲停留響七、八十年代嘅思想呢？
甚至乎香港班獻世派、官員等等，全部都冇利用價值；依家香港已經係警察社會，武官執政，佢哋唔係咁都睇唔明吓嘛？
其實依家香港有邊個心底裡唔愁？有邊個心底裡唔驚？有邊個心底裡唔躁鬱？唯一分別係，有啲人堅持，唔會自欺欺人，寧願唔出聲，都唔想扮一切正常無事。
但有啲人就可能已經呃人呃自己呃到連真假都唔識分。由呢班唔能夠面對現實嘅人執政，就係香港過去幾年最大嘅變化。
未來嘅歷史，會咁樣紀錄呢個城市，呢段日子：「香港嘅統治階級，用一個又一個嘅大話，去掩飾佢哋嘅過失。最初就滅絕晒所有講香港人嘅心聲，直到無人夠膽出聲，就迫所有人跟佢個套台詞；講一次唔夠，就講一百次；你唔信，就要你驚，驚到極點，就有斯德哥爾摩症候群，成為新嘅粉紅，對外面充滿仇恨。」
所以，選擇留低嘅每一個香港人，請保持內心嘅善良，對自己對別人都一樣。另外，要記住保持內心對是非黑白嘅判斷，保持對美嘅追求。
雖然我哋嘅空間越來越夾窄，越來越令人感到局促不安，但我哋嘅內心世界，永遠都係屬於自己嘅。
善護念。
This is a public episode. If you'd like to discuss this with other subscribers or get access to bonus episodes, visit leesimon.substack.com/subscribe
