Raportaz Spesyal lo Lafwar Losean (Ocean Fair) organize par Danny Faure Foundation

Fondasyon Danny Faure ti organize dezyenm Lafwar Losean le 7 ek le 8 zen 2024 pour selebre lazournen Losean. Lafwar Losean i en aktivite ki tonm anba de lobzektif prensipal Fondasyon Danny Faure. Premyerman se pour kontribye dan bann zefor lokal e enternasyonal pour protez lasante losean. Dezyenman pour ede promouvwar lekonomi ble koman prosen frontyer pour devlopman dirab.

Bi sa lafwar se pour sansibiliz manm piblik lo lenportans en losean dirab. Losean i annan en plas tre enportan dan kiltir Seselwa e i osi zwe en rol kle dan lekonomi larsipel Sesel. En lekonomi kotyer ki prospere I depan bokou lo eksplwatasyon dirab bann resours kotyer e lamarin.