ਸਿਡਨੀ ਦੀ ਲਾਇਬ੍ਰੇਰੀਆਂ 'ਚ ਰੱਖੀ ਇਸ ਕਿਤਾਬ 'ਤੇ ਕਿਉਂ ਪੈ ਰਿਹਾ ਰੌਲਾ?
ਸਿਡਨੀ ਦਾ ਪੱਛਮੀ ਇਲਾਕਾ ਬਹੁ ਸਭਿਆਚਾਰਕ ਪਿਛੋਕੜ ਦੇ ਲੋਕਾਂ ਦੀ ਰਿਹਾਇਸ਼ ਵਾਲਾ ਇਲਾਕਾ ਹੈ। Western Sydney ਦੀ ਬੜੀ ਮਹੱਤਵਪੂਰਨ ਕੌਂਸਲ ਹੈ Cumberland City Council । ਬੀਤੇ ਦਿਨੀਂ ਕੌਂਸਲ ਨੇ ਇੱਕ ਫ਼ੈਸਲਾ ਲਿਆ ਕਿ ਕੌਂਸਲ ਲਾਇਬ੍ਰੇਰੀਆਂ ਵਿੱਚੋਂ ਸਮਲਿੰਗੀ ਮਾਪਿਆਂ ਦੁਆਰਾ ਪਰਵਰਿਸ਼ ਕਿਵੇਂ ਕੀਤੀ ਜਾਵੇ ਇਸ ਕਿਤਾਬ ਨੂੰ ਬੱਚਿਆਂ ਦੇ ਸੈਕਸ਼ਨ 'ਚੋਂ 1 ਮਈ ਤੋਂ ਹਟਾ ਲਿਆ ਜਾਵੇਗਾ।
ਮਗਰੋਂ ਆਸਟ੍ਰੇਲੀਆਈ ਮੀਡੀਆ 'ਚ ਇਸ ਖ਼ਬਰ ਨੂੰ ਬੇਹੱਦ ਤਵੱਜੋਂ ਦਿੱਤੀ ਗਈ। "Same Sex Parents" ਸਿਰਲੇਖ ਵਾਲੀ ਇਸ ਕਿਤਾਬ ਨੂੰ ਹਟਾਉਣ ਦੇ ਨਾਮ 'ਤੇ ਸੂਬਾ ਸਰਕਾਰ ਨੇ ਕੌਂਸਲ ਨੂੰ ਧਮਕੀ ਤੱਕ ਦੇ ਛੱਡੀ, ਕਿ ਜੇਕਰ ਸਮਲਿੰਗੀ ਲਿਟਰੇਚਰ ਨੂੰ ਲਾਇਬ੍ਰੇਰੀ 'ਚੋਂ ਹਟਾਇਆ ਗਿਆ ਤਾਂ ਕੌਂਸਲ ਨੂੰ NSW ਸਰਕਾਰ ਵੱਲੋਂ ਇਸ ਲਾਇਬ੍ਰੇਰੀ ਲਈ ਮਿਲਦੀ funding ਰੋਕ ਦਿੱਤੀ ਜਾਵੇਗੀ।
ਕੱਲ੍ਹ ਯਾਨੀ ਬੁੱਧਵਾਰ ਰਾਤ ਕੌਂਸਲ ਨੇ ਇੱਕ ਹੰਗਾਮੀ ਮੀਟਿੰਗ ਰੱਖੀ ਅਤੇ 12 ਵੋਟਾਂ ਉਸ ਫ਼ੈਸਲੇ ਨੂੰ ਬਦਲਣ ਅਤੇ 2 ਵੋਟਾਂ ਫ਼ੈਸਲੇ ਨੂੰ ਲਾਗੂ ਰੱਖਣ ਦੇ ਨਾਮ 'ਤੇ ਪਈਆਂ। ਬਹੁਮਤ ਨਾਲ ਫ਼ੈਸਲਾ ਲਿਆ ਗਿਆ ਕਿ ਕਿਤਾਬ ਨੂੰ ਮੁੜ ਲਾਇਬ੍ਰੇਰੀ ਵਿਚ ਰੱਖਿਆ ਜਾਵੇ। ਵੱਡੀ ਗਿਣਤੀ ਵਿੱਚ ਸਥਾਨਕ ਲੋਕ ਜੋ ਇਸ ਹੱਕ ਵਿੱਚ ਨਹੀਂ ਹਨ ਕਿ ਉਹਨਾਂ ਦੇ ਨਿੱਕੇ ਬੱਚਿਆਂ ਨੂੰ ਸਮਲਿੰਗੀ ਸੰਬੰਧਾਂ ਬਾਰੇ ਕੋਈ ਸਵਾਲ ਆਵੇ, ਉਹ ਕੌਂਸਲ ਦੇ ਇਸ ਤਾਜ਼ਾ ਫ਼ੈਸਲੇ ਦੇ ਵਿਰੋਧ ਵਿੱਚ ਸੜਕਾਂ 'ਤੇ ਉਤਰ ਆਏ। ਦੂਜੇ ਪਾਸੇ LGBT ਭਾਈਚਾਰੇ ਨੂੰ ਹਮਾਇਤ ਦੇਣ ਵਾਲੇ ਲੋਕ ਸਨ।
ਅਜਿਹੇ ਵਿਚ ਹੁਣ ਇੱਕ ਕਿਤਾਬ ਭਾਈਚਾਰੇ ਵਿੱਚ ਨਫ਼ਰਤ ਫੈਲਾਉਣ ਅਤੇ ਵਿਵਾਦ ਦਾ ਕਾਰਣ ਬਣ ਚੁੱਕੀ ਹੈ।