【是日隨想】我與演算法作對

有段日子，我覺得自己作客去其他人嘅頻道咪好囉。但係好快就發現，呢個世界有兩種人。第一種，想睇啲同平時唔同嘅觀點。另一種，就係想聽啲自己想聽到嘅說話。

兩種人好難同時滿足；我亦假設，多數人自然情況下，都係後者。所以，我都明白我嘅讀者、聽眾群，應該係會少其他人一大段距離。

大家知我有自己嘅頻道嘛？ 利世民 - YouTube

錄片、錄 podcast 有本身嘅價值。如果話要保留香港話嘅文化，影像聲音嘅效率高過文字好多。當然假設內容值得保留到未來。

有乜內容值得保留？歷史囉。講咗都成年嘅「香港紀事本末」，寫極都只係得頭兩章；咁不如斬件上？斬件上又不如先口述一次。如是者，我自己嘅 Youtube 頻道嘅主題系列之一，就係「紀事本末」。

另一個，就係「香港人的 PPE」。

之前有朋友想我講多啲 PPE ，即係 Philosophy 、 Politics 、 Economics ；最初應該係 1920 年代，亦即係近代進步主義最盛行嘅日子，牛津開嘅本科。PPE 嘅特點係跨唔同範疇，著重實用。

Youtube 頻道最後一個系列，暫時諗到嘅係「傳媒解讀片」；呢個系列一來係希望解吓 social media 嘅 toxic culture ，二來都係要為個頻道去增加下啲流量。雖然我話自己唔志在要好多 subscribers ，但可以 reach 到更多人，梗係好。

咁點樣可以做到呢？不如就揀當時多人講嘅題目，順個便。從逆思維咁去拆解主流嘅講法，而又唔令人感到冒犯，我相信都係一種修為。而點樣貼市之餘又唔會跟車太貼呢？就暫時我都未諗到。

另外，就係由舊年開始嘅讀書會。我對呢個 project 係完全無放棄過。之前以寫文嘅方式，但諗諗吓講書先至最應該錄片、錄 Podcast 。總之，有拖無欠。

最後，預告吓，我同自由亞洲電台將會有個每星期嘅節目，叫財經自由講。主題都係中、港嘅金融財經，呢個節目，我嘅角色會係主持兼任類似監製，亦會搵啲拍檔合作主持。

This is a public episode. If you'd like to discuss this with other subscribers or get access to bonus episodes, visit leesimon.substack.com/subscribe